اسلام آباد(خبرنگارخصوصی) اسلام آباد ماڈل کالج ایف سیون فور میں کالج کے قیام کے 52 برس مکمل ہونے پر ایلومنائی ڈنر کی تقریب منعقد ہوئی، اس تاریخی موقع پر کالج کے سابق طلبہ و طالبات اور اساتذہ کی کثیر تعداد نے شرکت کی۔ کالج کے قیام کے بعد یہ اپنی نوعیت کا پہلا ایونٹ تھا جس میں پہلی بار کالج کے درخشاں ستارے اپنے ادارے میں واپس آئے اور پرانی یادیں تازہ کیں۔ کالج ہذا کے سابق طلبہ و طالبات میں ڈاکٹرز، انجینئرز، چارٹرڈ اکانٹنٹس، مسلح افواج کے افسران اور سول سرونٹس شامل ہیں۔
تمام ایلومنائی ممبران نے انتہائی جوش و خروش سے کالج میں وقت گزارا اور ادارے میں وقت کے ساتھ ساتھ آنے والی تبدیلیوں کو دیکھ کر بے حد خوش ہوئے۔ تقریب میں کالج کی بانی پرنسپل ایف ایچ نور کو خراجِ تحسین پیش کیا گیا جن کی قائدانہ بصیرت اور بے مثال کاوشوں نے اس عظیم ادارے کی بنیاد رکھی۔ کئی شرکا نے دل کو چھو لینے والی یادیں شیئر کیں۔ کالج کی موجودہ پرنسپل پروفیسر ڈاکٹر سعدیہ عزیز نے تقریب کے اختتام پر ایلومنائی کا شکریہ ادا کیا۔